Ня змыты крывавыя плямы
На пляцы на бруку сівым.
Вітрыны разьбітыя ў крамы,
Крыжы паламаны ў царквы.
У горадзе голад і холад,
Плакаты, салдаты, сьцягі.
Як рана крывавая горад,
Засьмяглі ў ракі берагі.
Зладзюгам жыцьцё як маліна.
Гарэлка ракою, табак.
«Мо', пану, ахвота жанчыну?» –
Жанчын прапануе паляк.
Вагоны паўнюткія жыта
На захад імчаць цягнікі.
Ля горада ў лесе бандыты,
У горадзе – бальшавікі.
Народ пераменаў чакае,
Сагнутаму – іх не відаць.
Па радыё музыка грае,
І клічуць шпіёнаў шукаць.
Жывуць беларусы і вераць
У сьветлы і праведны дзень.
А дзень, нібы воблака, шэры
У Заўтра кідае свой цень.
Ня змыты крывавыя плямы
На пляцы на бруку сівым.
Вітрыны разьбітыя ў крамы,
Крыжы паламаны ў царквы.
|
|
